ஆசைகளை அவளறிவாள்
தன் வஞ்சக விழிகளில் சிரித்து
மென்மை வழியும் குரலினை
சாம்பல் காலங்களின் முனையினில் மாட்டி
தூண்டிலென எறிவாள்
கபடங்களறியாக் கண்களைக் கொண்ட
பிஞ்சுமனங்களை அவளிடம்
கொடுத்துப் பார்த்திருங்கள்
அல்லது
உலகம் மிகவும் நல்லதெனச்
சொல்லிக் கொண்டிருக்குமொரு மனிதனை
அவளிடம் விடுங்கள்
அம் மனிதன் தானாகவே
முன்பு நல்லதெனச் சொன்ன நாவை
கருஞ்சுவரில் தேய்த்துக்கொள்ளும்படியான
நஞ்சை மிடறாக்கி
அருந்த வைத்திருப்பாள் அவள்
கைவசமிருக்கும்
எல்லா நெஞ்சங்களையும்
கெட்டதாக்கி அழுகவைத்துப்
பின்னொருநாள் புது இதயங்களுக்கு
மீண்டும் தூண்டிலிடவென விட்டுச் செல்வாள்
அழுதழுது நீங்கள்
அவளைத் தேடிச் சென்றால்
உங்களைத் திரும்பச் சொல்லி
மென்மையானதென நீங்கள் சொல்லும்
அவளது பாதங்களால் எட்டியுதைப்பாள்
கொடுந்தீய வார்த்தைகளையெல்லாம்
எச்சிலோடு காறி உங்கள்
வாடிய முகங்களில் துப்பிடுவாள்
பிஞ்சு மனங்களை, நல்ல மனிதனை
வக்கிரங்களறியவென
அவளிடம் கொடுத்த நீங்கள்
இதையெல்லாம்
சகித்துக்கொள்ளத்தான் வேண்டும்
ஏனெனில் அவள்
சாகசக்கார வெளியில்
வன்முறைகளை விதைப்பவள்
- எம்.ரிஷான் ஷெரீப்,
இலங்கை.
லண்டன் தமிழ் வானொலியில் ஒலிபரப்பான இக்கவிதையை ஒலிபரப்பாளர் ஸைஃபா பேகம் அவர்களின் குரலில் கேட்க...
நன்றி -
* நவீன விருட்சம் காலாண்டிதழ்
* லண்டன் தமிழ் வானொலி
14 comments:
என்ன இத்தனை கோபம் ?கவிதை ரொம்பவும் உக்கிரமாக இருக்கிறது
Sir, R u fine now? Best wishes..
படித்தேன். மகிழ்ந்தேன்
கேட்டேன்........ரசித்தேன்....
நண்பா,
வன்முறையைக் கட்டவிழ்த்துவிடும் அவளிடம் எதையும் இனி கொடுக்க வேண்டாம். அவளது ஆசை வார்த்தையில் வீழாது இருப்பதற்கான மன உறுதியை மட்டும் வளர்த்துக் கொள்ள வேண்டும்
அருமைங்க ரிசான்
சாகசக்காரியிடம் சிக்கித்தான் சின்னாபின்னமாகி இருக்கோம் நாங்கள்
வாழ்த்துகள் ரிஷான்.. ஆனால் ஏன் இப்படியான ஒரு வர்ணனை , வருத்தம் னு புரியவில்லை.. அதுவும் பெண்ணைப்பழிப்பதாய்...
இருப்பினும் ஒரு ரத்தக்காட்டேரியை கண்முன் கொண்டுவந்தது கவிதை...
பத்திரமாகத்தான் இருக்கணும்.. குழந்தையை கொடுக்கலாமோ?..
ரிஷான் சாகசக்காரி யார்????? சொல்லுங்களேன் ..கவிதை அருமை
ஒரு பெண்ணை வித்தியாசமாக வடிவமைத்த கவிஞன் /நன்று / ஒரு பெண்மை இவவளவு வித்தியாசமாக இருக்குமா?
பெண் என ஒரு நாட்டை குறிக்கிறாரோ என எண்ணுகின்றேன்...
மீண்டு(ம்) வந்தமைக்கு வாழ்த்துக்கள் ரிஷி..
என்ன இவ்வளவு வருத்தம்?? :((((((((
அன்பின் தம்பி ரிஷான்,
எகிறிக் குதிக்கும் வார்த்தைகள், நெஞ்சத்தின் அதீத ஆத்திர உணர்வுகளை
அழகாய்ப் ப்டம் பிடித்துக் காட்டுகிறது.
"கவிஞனின் உணர்வுகள் கவிதை எழுதும் அந்த நிமிடங்களிலே தான் அவன்
உள்ளத்தில் நர்த்தனமாடுகின்றன" என்னும் கருத்தை முற்று முழுதாக
ஆதரிப்பவன் நான்.
கவிதைகள் என்றுமே கவிஞனின் வாழ்வில் நடந்த ஒரு உண்மைச் சம்பவமாக
இருக்கும் என்பது நியதியல்ல, அப்படி இருக்கக்கூடாது என்றொரு விதியும்
இல்லை.
கவிஞர்களின் சிறப்பு என்னவெனில் ஒரு காட்சியை கற்பனையில் உருவகித்து
அதற்கு உணர்ச்சித் ததும்பலுடன் கூடிய வார்த்தைகளைக் கொடுத்து படிப்போரை
அந்த உணர்வுகளுக்குள் அந்த சொற்பநேரம் மிதக்க விடுவதேயாகும்.
ரிஷான் உங்கள் கவிதையின் உணர்ச்சிகள் மிகவும் ஆழமானது. ஒரு தூய்மையான
அன்பான இதயத்தை உடைத்தெறியும் பெண்ணால் பாதிக்கப்பட்ட ஒரு ஆணின்
உணர்வுகளைத் தத்ரூமாக வடித்திருக்கிறீர்கள்.
இதையே பால் மாற்றி பெண்ணொருத்தி ஆணால் வஞ்சிக்கப்படும் போது ஏற்படும்
உணர்வென்ரு கூட ர்டுத்துக் கொள்ளலாம்.
அருமையாக இருக்கிறது.
வாழ்த்துக்கள்
அன்புடன்
சக்தி
இந்த சாகசங்களே அவளையும் சாகடித்துவிடும். ஏய்த்தோ ஏமாற்றியோ வஞ்சனை சூதோடு பிழைக்கின்ற எந்தப்பிழைக்கும் ஆயுள் அதிகம் இல்லை.
காலங்கள் சில தேவைகளை எதைக்கருதியோ செய்கின்றது அதன் காரணம் புரியவரும் போது...
சாகசத்தின் சலிப்புகள் அவளுக்கே புரியும்.
'ரிஷான்,
சொல்லவேண்டியதை நேர்த்தியாகச்சொல்லி இருக்கின்றீர்கள்.
ஆகா
மீண்டும் ரிஷான்.............
இப்போதைக்கு இதைத்தவிர வேறெதுவும் மனதுக்குள் இறங்கவில்லை
Post a Comment