விஷமேறிய மரத்தின் சிற்பம்

மலைப்பாம்புக் குட்டிகளென விழுதுகளைப் படர விட்ட
மரத்தின் ஆதிக் கிளைகள்
காட்சி கூடத்தில் வனம் பார்க்கும் சிற்பங்களாகின்றன

விருட்சங்களை வெட்டிச் செல்லும்

விஷமேறிய பார்வைகளை சிற்பி

காடுகளெங்கிலும் சுமந்தலையும் செம்மாலை நேரங்களில்

வன மரங்களின் இலைகளினூடு சூரியனாடும் மஞ்சள் நடனம்

எவ்வளவு ப்ரியத்துக்குரியது

நச்சேற்றிய சிற்பியின் பாதங்களிலேயே வீழ்ந்து கிடக்கும் மரங்களில்

அவனது எண்ணங்களிலிருந்தும் ஆற்றல்களிலிருந்தும் உருவாகிய

வனக் கொலைகளுக்கான ஆயுதங்கள் தீட்டப்படுகையில்

வன்மங்கள் கூராகின

இங்கு தாயின் கரத்திலிருந்துகொண்டே தடவிப் பார்க்கிறது

புராதனச் சடங்குகளின் பிரிந்த விம்பங்களென

தனித்திருக்கும் அம் மரச் சிற்ப விலங்குகளால்

எவ்வித ஆபத்துமில்லையென்பதை உணர்ந்த குழந்தை

பிஞ்சு விரல்கள் தொட்ட மரங்கள்

உடல் சிலிர்த்து எழுந்திடப்

பற்றியெரிகிறது மலைக் காடு

 - எம்.ரிஷான் ஷெரீப்

16012012

நன்றி

# உயிர்நிழல் - இதழ் 35 - ஜூலை, 2012

# எதுவரை - இதழ் 06 - நவம்பர், 2012

# உயிர்மை

# திண்ணை 

# Artist - Mr. Roshan Dela Bandara

வீழ்தலின் நிழல்

ஒரு கோட்டினைப் போலவும்

பூதாகரமானதாகவும் மாறி மாறி

எதிரில் விழுமது

ஒளி சூழ்ந்த

உயரத்திலிருந்து குதிக்கும்போது

கூடவே வந்தது

பின்னர் வீழ்ந்ததோடு சேர்ந்து

ஒரு புள்ளியில் ஐக்கியமாகி

ஒன்றாய்க் குவிந்ததும்

உயிரைப் போல

காணாமல்போன நிழலில்

குருதியொட்டவே இல்லை


- எம். ரிஷான் ஷெரீப்

நன்றி
# உயிர்மை
# திண்ணை
# நவீன விருட்சம்

உன் காலடி வானம்

அன்றைய மழைக்கால முன்னிரவில்

அவளது நீண்ட நேரக் காத்திருப்பின் முடிவு

பேருந்துத் தரிப்பிடத்தில் தேங்கி நின்றதோர் கணம்

தாண்டிச் சென்ற எவரையோ அழைத்துப் பேசி

கூடச் செல்லுமுனது பார்வையின் கீழே

நழுவியதவளது பூமி

தெருவோரம் எவரோ வெட்டி வீழ்த்தியிருந்த

மரத்தினை நோக்கிக் கூடு திரும்பிய பட்சிகள்

இருளாய் வட்டமிட்ட அன்றைய இரவு

ஒரு சாத்தானின் உருவம் கொண்டது

அந்தகாரத்தில் உனது நடை

மீன்களின் நீச்சலை ஒத்திருந்தது

நீ எடுத்து வைத்த ஒவ்வொரு எட்டிலும்

நதிகள் உதித்தன

தண்ணீரில் தோன்றிய மலையின் விம்பத்தில்

தலைகீழாய் ஏறினாய்

வானவில் தொட்டில் அந்தரத்தில் ஆடிய

அம் முன்னந்திப் பொழுதில்

இதுநாள் வரையில் அவள் கண்டிருந்த

மேகங்கள், வெண்ணிலவு, நட்சத்திரங்களெல்லாம்

உன் காலடியில் நீந்தின

அந்தப் பயணத்தின் முடிவில்

இருவரும் பிரிந்துவிடுவதான உறுதி

தீர்மானமாயிற்ற பின்னரும்

உனக்காக மட்டுமே காத்திருந்தவளை

விழுங்கிய அம் மௌனச் சிலந்தி

நீர் வலைப்பின்னல்களின் மீது

இன்னும் ஊர்கிறது

இரவின் பனியோடு சொட்டுகிறது

எட்டுக்கால் பூச்சியின் ரேகைகள்

- எம்.ரிஷான் ஷெரீப்,

இலங்கை

நன்றி
# அம்ருதா இதழ் - பெப்ரவரி 2012
# எதுவரை இதழ் - 03, ஜூலை 2012
# உயிர்மை
# திண்ணை

காத்திருப்பு

காற்றுக் குதிரைகள் கிளர்ந்து கிளப்பிய
தூசுப் படலத்தினுள்
சேர்த்து வைத்திருந்த இனிய பாடல்களும்
அந்தி விசும்போடு சிதைந்தழிந்தன
பகல் முழுதும் தீக் கண்களால்
பார்த்திருந்த வெயில்
மேகக் கூட்டத்துக்கு
மேலும் நீர் கோர்த்தது
　
கதவுகளைத் திறந்தேதான்
வைத்திருக்கிறேன்
எந்த ஓவியனாவது வந்து
வெயிலைப்போல
அல்லது சாரலைப்போல
ஏதேனும் கிறுக்கிச் செல்லட்டும்
ஒரு தபால்காரனாவது வந்து
ஏதேனும் தந்துசெல்லட்டும்
ஒரு வண்ணத்துப்பூச்சி
பூக்களின் வாசனைகளோடு
வந்துசெல்லட்டும்
அன்றேல்
மெதுநடைப் பூனையொன்றேனும்

- எம்.ரிஷான் ஷெரீப்

நன்றி
# யாத்ரா இதழ் - 20, ஜனவரி 2012
# எதுவரை இதழ் - 03, ஜூலை 2012
# உயிர்மை
# திண்ணை

நினைவுகள் மிதந்து வழிவதானது

இருளின் மொழியைப் பேசும்

தண்ணீர்ச் சுவர்களை ஊடறுக்கும்

வலிமைகொண்ட நீர்ப் பிராணிகளை உள்ளடக்கிய

வனத்தின் நீரூற்றுக்கள்

பெரும்பாலும் மௌனமானவை

எப்பொழுதேனும் வனம் பற்றும் நாளில்

பரவியணைக்கப் போதா நீர்

நதியாகிப் பெருக்கெடுத்தோடுவதில்

யாது பயன்

காலம் காலமாக அழிந்த மர விலங்குடல்களை

செரித்து

தேயாப் பசி கொண்ட கானகத்தின்

எப் பெருவிருட்சத்தின் வேர்

அகன்ற வாயைக் கொண்டதுவோ

புராதனச் சிதிலங்கள் தொக்கி நிற்கும்

இக் காட்டிலெது நீ

அண்டும் குருவிகள் எக்கணமும்

குருதி சிந்தப் பறக்கக் கூடுமான

முற்செடியொன்றின் ஒற்றைப் பூ

விஷமெனப் பலரும்

விட்டொதுங்கக் கூடுமான

பாம்புப் புற்றருகில் தனித்த காளான்

இக் காட்டிலெது நீ

உள்ளே செல்ல எப்பொழுதும்

அனுமதி மறுக்கப்படக் கூடுமான

மாளிகை வாசல் யாசகன்

எவராலும் கரை சேர்க்கப்படாமல்

பயணம் தொடரக் கூடுமான

நதி முதுகின் இலை

மற்றுமோர் அழியா மேகமும் நான்

தவிர்ப்புக்களுக்கு வசப்படா

நினைவுகள் மிதந்து வழிவதானது

மெதுவாய்க் கொல்லும் நச்சு

இப்பொழுதும்

உள்ளிருந்து விழிகளுக்கு

தாவித் தீர்க்கும் உள்ளாழ்ந்த நிறைகனல்

உன்னால் தோன்றியதுதான்

- எம்.ரிஷான் ஷெரீப்
நன்றி
# அம்ருதா இதழ் - பெப்ரவரி, 2012
# எதுவரை இதழ் - 02, ஜூன், 2012
# உயிர்மை
# திண்ணை

பன்னீர் முத்துக்களைக் காய்க்கும் இளவெயில்

வானக் கரிய வாவியில் மின்னி நீந்திடும்

சிலவேளை

வீழ்வதாய்ப் போக்குக் காட்டும்

ஊணுண்ணிப் பட்சியென மீன்கொத்தி நிலா

மேற்கிலிருந்து கிழக்காய் நகர்ந்து நகர்ந்து கொத்திட

காலையில் செவ்வாகாயம் வெறிச்சோடிக் கிடக்கும்

இடித்திடித்துக் கொட்டிய

நேற்றின் இரவை நனைத்த மழை

உனதும் எனதுமான ஏகாந்தப் பொழுதொன்றை

நினைவுறுத்திக் கொண்டேயிருந்ததில்

அச்சமுற்றிருந்தேன் நான்

மின்சாரம் தடைப்பட்டெங்கும்

அந்தகாரம் மேவிய பொழுதில் கண்மூடி

விழித் திரைக்குள் உனையிறக்கியிருந்தேன்

உதறப்பட்ட காலத்தின் துளிகளோடு

உன் மீதான எனது சினங்களும்

ஆற்றாமைகளும் வெறுப்பும்

விலகியோடிப் போயிருக்கவேண்டும்

நினைத்துக் கொண்டேயிருந்தேன் உன்னையே

அப் பாடலைப் பாடியபடி

அச் செல்லப் பெயரால் எனை விளித்தபடி

பிரகாசத்தையள்ளி வீசுமுன் குரலையும் கேட்டேன்

அங்குமிங்குமசையும் ஊஞ்சல்

அந்தரத்தில் சரணடையும் ஆவல்

அக் கணத்து மனநிலையை என்சொல்வேன்

அகழ்வுகளுக்குள் தேடினால் அர்த்தமற்ற நம்

சச்சரவுகளின் நூலாம்படை திரண்டுகிடக்கும்

எமக்கெதிரான

எல்லாப் புழுதிகளுமெழும்பிக் கட்டிய மதிலதன்

அத்திவாரத்தில் இருவரில்

எவரது அன்பைப் போட்டு மூடினோம்

இனித் தவறியும் ஒருவரையொருவர்

நினைத்தலோ பார்த்தலோ கதைத்தலோ

ஆகாதெனும் விதியை நிறுவிச் சலனங்களை

விழுங்கிச் செறிக்க முடியாது

விழி பிதுங்கி நிற்கும் நம் துயர் பொழுதுகள்

யுகங்களாகத் தொடர

வேண்டியிருந்தோமா

பிரிவின் அன்றை

இருவரும் எப்படியோ வாழ்ந்து கடந்தோம்

சர்வமும் நிகழ்ந்து முடிந்தது பூமியில் அன்றும்

பின்வாசல் சமதரைப் புல்வெளி

நிலவின் பால் குடித்தரும்பிய

பன்னீர் முத்துக்களைக் காய்க்கும் இளவெயிலில்

இரவின் சாயல் துளியேதுமில்லை

- எம்.ரிஷான் ஷெரீப்

நன்றி
# அம்ருதா இதழ் - பெப்ரவரி, 2012

# எதுவரை இதழ் - 02, ஜூன்,2012

# நவீன விருட்சம்

# திண்ணை